Gaur, ekainak 5, ‘WORKinn Talent Hub’ foroa inauguratu da Bilbao Exhibition Centre-n (BEC), eta bihar arte (ekainak 6) egongo da zabalik. Foro hau funtsezko topagune bat da talentuaren eta industriaren artean. Makina-erremintaren Nazioarteko Biurtekoaren (BIEMH 2024) 32. edizioaren barruan, plataforma paregabea da industria-arloan enpresak sustatzeko, eta aukera paregabea ematen die enpresa horiei lan-merkatuan sartzear dauden gazteekin kontaktatzeko.
DEMA, Bizkaiko Foru Aldundiaren Enplegu eta Ekintzailetzako Foru Agentziak stand bat ipini du foroan, informazioa eta aholkuak emateko enplegagarritasuna bilatzeko eta hobetzeko programei eta jarduerei buruz.
Ekitaldiaren inaugurazio ofizialean izan dira Alfonso Gurpegui, Eusko Jaurlaritzako Lan eta Enplegu Saileko Enplegu eta Gazteria sailburuordea, eta Teresa Laespada, Bizkaiko Foru Aldundiko Enplegu, Gizarte Kohesio eta Berdintasuneko foru diputatua. Azken horrek, bere hitzaldian, talentua erakarri eta sortzearen garrantzia azpimarratu du, nabarmenduz biztanleria migratzailea gazteriaren kontzeptuan sartzeko eta enplegagarritasunari ikuspegi askotariko eta zabal batetik heltzeko beharra.
“Bat natorrelako talentua erakarri behar dela diotenekin, baina baita talentua sortu egin behar dela diotenekin ere. Eta gazteen kontzeptuan sartu behar ditugu dagoeneko Bizkaian bizi diren eta gu bezain bizkaitarrak diren biztanle migratzaile guztiak. Lan egin behar dugu gazteriaren kontzeptu anitzago eta zabalago batekin, kanpotik etorritako biztanle guztien enplegagarritasuna erronka bat dela ulertuta. Dena dela, era berean, printzipioen eta aukera-berdintasunaren kontu bat da, ahaztu gabe ere aukera bat eta ia-ia premia bat ere badela, gure populazioa zahartzen ari den honetan“, adierazi du Laespadak.
Gainera, nabarmendu du emakumeen talentua baloratzearen eta aprobetxatzearen garrantzia, eta adierazi du industriak eta sektore teknologikoak emakume gehiago kontratatu behar dituztela, alferrik ez galtzeko Bizkaian eskura dagoen talentuaren erdia. “Bai, emakumeok Bizkaiko talentuaren erdia gara. Industriak eta mundu teknologikoak gizonak baino gutxiago kontratatzen gaituzte. Gure talentua alferrik galtzen ari dira. Eta, migrazioarekin gertatu bezala, emakumeekin ere ez gaude talentua alferrik galtzeko“.
‘WORKinn Talent Hub’ foroaren xedea da gazteak mundu industrialarekin konektatzea, gune berezi bat sortuta, non talentu berriak aukerak aurkituko dituen eta enpresek etorkizuneko profesionalak deskubritu.
